Íslenska klínikin er í eigu þriggja Íslendinga, Hjalta Garðarssonar, Hrafnhildar Sigurðardóttur og Hauks Hjaltasonar, sem keyptu tannlæknastofuna vorið 2021 af norskum fjárfestum eftir lokun hennar vegna kófsins, en tannlæknastofan var stofnuð árið 2012.

 

Ungverjar eru þekktir fyrir góðar tannlækningar og landið lengi verið miðstöð lækninga og heilsu. Margir Íslendingar hafa stundað læknisnám þar með góðum árangri.

 

Hjá Íslensku klínikinni eru sex aðgerðarherbergi ásamt stórri og rúmgóðri skurðstofu.

 

Sagan er svo sem ekki flókin. Hjalti fór sjálfur á stofuna árið 2013 til að láta laga í sér tennurnar og var himinsæll með árangurinn, svo sæll að hann gerðist umboðsmaður stofunnar og brátt streymdu landsmenn í vandaðar tannlækningar á allt öðru og betra verði en þeir höfðu þekkt. Hjalti og Hrafnhildur gerðust meðeigendur þar til þau keyptu stofuna alfarið ásamt Hauki sem er sonur þeirra.

 

Sömu tannlæknar og starfsmenn hafa verið frá upphafi en lykillinn að frábæru starfi er reynsla og gott handverk. Fjórtán tannlæknar, allir með sérfræðimenntun, starfa á stofunni.  

 

Tanngervasérfræðingar sjá um krónur og gervitennur. Þarna starfa líka skurðlæknar, tannrótarsérfræðingar og sérfræðingar í tannholdssjúkdómum.